» ‘प्रेमगीत ३’बाट प्रदीपले भारतमा जिते अवार्ड

» ‘प्रेमगीत ३’बाट प्रदीपले भारतमा जिते अवार्ड

मनोरञ्जन

Sharing is caring!

 

दशैं छेको पारेर भारतसँगै नेपालमा प्रदर्शनमा आएको फिल्म ‘प्रेमगीत ३’को हिन्दी डबबाट अभिनेता प्रदीप खड्काले उत्कृष्ट डेब्यू अभिनेताको अवार्ड जितेका छन् । यही नोभेम्बर १० देखि १३ तारिखसम्म भारतको आग्रामा भएको ‘ग्लोबल ताज अन्तर्राष्ट्रिय फिल्म फेस्टिभल’मा उनले डेब्यू अभिनेताको अवार्ड जितेका हुन् । अवार्ड प्राप्त गरेपछि खिचिएको तस्विरमा उनी खुसी देखिएका छन् ।

यो फेस्टिभलमा ‘प्रेमगीत ३’को हिन्दी डबसहित भारत, रुस, डेनमार्क, अमेरिका, यूके, इजिप्ट लगायतका देशका दर्जन बढी फिल्म प्रतिस्पर्धामा थिए । केही हप्तादेखि भारतमा रहेका प्रदीपको ‘प्रेमगीत ३’को हिन्दी डब प्रदर्शन भएसँगै बलिउडकर्मीसँग निकटता बढेको छ । उनी दुई हप्ता अगाडि मुम्बईमा भएको बलिउड फिल्म ‘डबल एक्सएल’को प्रिमियरमा समेत सहभागी भएका थिए ।

‘प्रेमगीत ३’को भारत प्रदर्शनले प्रदीपलाई बलिउड प्रवेश गर्नका लागि ठूलो ढोका खोलेको छ । स्रोतका अनुसार, चाँडै उनले एक बलिउड फिल्म साइन गरेको खबर सार्वजनिक हुन सक्नेछ । उनी यसैका लागि निर्माता सन्तोष सेनको साथमा दुई/तीन हप्तादेखि मुम्बईमा छन् । भारतमा ‘प्रेमगीत ३’ले उच्च कमाई नगरेता पनि प्रदीपको लुक्स र वाककलाले बलिउडकर्मीलाई लोभ्याएको छ ।

‘प्रेमगीत ३’ अभिनेता खड्काको करिअरकै सर्वाधिक कमाई गर्ने पहिलो फिल्म हो । नेपालमा यो फिल्मको हिन्दी र नेपाली भर्सनले ठूलो कमाई गरेको छ । तर, ‘कबड्डी ४’को रेकर्ड तोड्ने उनको दाबी भने फिल्मले पूरा गर्न सकेन । यद्यपि, ‘प्रेमगीत ३’ले नेपाली फिल्मका लागि भारतीय बजारमा ठूलो ढोका खोलेको छ । भविष्यमा यसको फाइदा धेरै नेपाली फिल्मले उठाउन सक्ने देखिन्छ ।


Leave a Reply

Your email address will not be published. Required fields are marked *