‘तिम्रो मेरो साथ’लाई छाडेर साम्राज्ञी ‘ह्यारी कि प्यारी’तिर – Satyapati

‘तिम्रो मेरो साथ’लाई छाडेर साम्राज्ञी ‘ह्यारी कि प्यारी’तिर – Satyapati

मनोरञ्जन

Sharing is caring!

अभिनेत्री साम्राज्ञी आरएल शाह तीन वर्षपछि फिल्म ‘तिम्रो मेरो साथ’मार्फत् दर्शकमाझ पुगेकी छन् । यो फिल्मप्रति उनलाई ठूलो अपेक्षा थियो । लगातार आफ्ना फिल्महरु असफल भैरहेको अवस्थामा यसले राहत दिने विश्वासमा उनी थिइन् । तर, शुक्रबारबाट प्रदर्शित फिल्मले सुखद् कमाई गर्न सकेको छैन ।

मल्टीप्लेक्सहरुमा घट्दो शोले पनि फिल्मलाई दर्शक अभाव रहेको बुझाउँछ । प्रदर्शनपूर्व साम्राज्ञीले फिल्मको प्रचारमा राम्रै दौडधुप गरेकी थिइन् । एक हप्ता उपत्यकाबाहिरका विभिन्न शहर पुगेर प्रचार गरिन् । काठमाडौंमा पनि उनी दिनरात खटिइन् । तर, रिलिजको भोलीपल्टैबाट उनले यही माघ २० गतेबाट प्रदर्शनमा आउन लागेको आफ्नो नयाँ फिल्म ‘ह्यारी कि प्यारी’लाई काखी च्यापिन् ।

यतिबेला उनी यो फिल्मको प्रचारका खातिर मोफसल दौडाहामा छिन् । उनले अर्को फिल्मलाई साथ दिएपछि यतिबेला ‘तिम्रो मेरो साथ’ले अभिनेताद्वय पुष्प खड्का र सन्दीप क्षेत्रीको मात्र साथ पाएको छ । शनिबार विभिन्न हल पुगेर पुष्प र सन्दीपले दर्शकसँग साक्षात्कार गरे । सोमबार राजधानीमा आयोजित स्पेशल स्क्रिनिङमा पनि उनीहरुकै उपस्थिति थियो ।

प्रदर्शनपछि फिल्मलाई बेवास्ता गरेको भन्दै निर्माण टिम साम्राज्ञीप्रति असन्तुष्ट छ । साम्राज्ञीले फिल्म रिलिजलगत्तै साथ छाडेकोप्रति लक्षित गर्दै ‘प्रेमगीत’ सिरिजका निर्माता सन्तोष सेनले निर्माताको पीडा बुझ्न आग्रह गरेका छन् । ‘तिम्रो मेरो साथ’को पोस्टर फेसबुकमा शेयर गर्दै उनले एउटा फिल्म बनाउन चार–पाँच सयको मिहिनेत लाग्ने, करोडौंको लगानी र वर्षौंको समय लाग्ने तर यहाँ जन्माएर अलपत्र छाडेर जाने कलाकार रहेको भन्दै साम्राज्ञीप्रति पेचिलो कटाक्ष गरेका छन् ।

‘हाम्रो चलचित्र उद्योग बामे सर्दैछ, हिँड्न सकेको छैन । कसैले फुर्ती नलगाए हुन्छ । लगानी आउने ०.५ प्रतिशत ग्यारेन्टी नहुँदा नहुँदै यत्रो चुनौती मोलेको अवस्थामा कम्तिमा प्रदर्शनको दुई–तीन दिन त साथ दिनुपर्छ, चिन्तित हुनुपर्छ । आत्मारतीमा रमाउनभन्दा पनि सिंगो क्षेत्रलाई अगाडि लिएर जानुपर्छ भन्ने सोच पालौं । ‘तिम्रो मेरो साथ’ मनोरञ्जनात्मक चलचित्र हल हलमा,’ उनी लेख्छन् ।

उनको स्टाटसमा ‘तिम्रो मेरो साथ’का निर्देशक तथा निर्माता रमेश एमके पौडेलले दुईवटा कमेन्ट गरेका छन् । पहिलो कमेन्टमा उनले सेनलाई धन्यवाद दिएका छन् भने दोस्रो कमेन्टमा ‘यो कटु सत्यका लागि धन्यवाद’ भनेका छन् । उनी साम्राज्ञीले रिलिजपछि साथ छाडेकोप्रति असन्तुष्ट रहेको यसबाट पनि बुझिन्छ । सेनको भनाईमा निर्देशक शोभित बस्नेतले पनि सहमति जनाएका छन् ।

Leave a Reply

Your email address will not be published. Required fields are marked *