हत्या लुकाउन गुपचुप शव गाडियो, एक वर्षपछि आरोपितद्वारा आत्मसमर्पण

हत्या लुकाउन गुपचुप शव गाडियो, एक वर्षपछि आरोपितद्वारा आत्मसमर्पण

समाचार

Sharing is caring!

हत्या लुकाउन गुपचुप शव गाडियो, एक वर्षपछि आरोपितद्वारा आत्मसमर्पण

१९ असार, विराटनगर । सुनसरी प्रहरीले श्रीमती हत्या आरोपमा एक जनालाई नियन्त्रणमा लिएको छ ।

हरिनगर गाउँपालिका – १ की ४३ वर्षीय रसिदा खातुनको हत्या आरोपमा उनका श्रीमान स्तुल मियाँलाई नियन्त्रणमा लिएको हो ।

प्रहरीका अनुसार ९ असार २०७६ मा घटना भएपछि फरार मियाँ बुधबार आफैं जिल्ला प्रहरी कार्यालय सुनसरीमा हाजिर भएका थिए । त्यसपछि उनलाई नियन्त्रणमा लिएर अनुसन्धान थालिएको छ ।

गाडिएको शव उत्खनन

जिल्ला प्रहरी कार्यालय सुनसरीका प्रहरी उपरीक्षक कमल थापाका अनुसार ९ असार २०७६ मा रसिदाको शंकास्पद मृत्यु भएको थियो । उनको घाटीमा गम्भिर चोट थियो ।

तर प्रहरीलाई जानकारी नगराई भोलिपल्ट बिहान शव गाडियो । मुस्लिम संस्कार अनुसार शवको अन्त्यष्टिपछि प्रहरीमा मृत्यु कालगतीले नभएको सूचना पुगेपछि प्रहरीले शव उत्खनन गरी अनुसन्धान सुरु गरेको थियो ।

अनुसन्धानका क्रममा घाँटीमा चोट देखिएको थियो । ‘घाटीको चोट शंकास्पद रहेछ’, प्रहरी उपरीक्षक थापाले भने, ‘पोष्टमार्टम गर्दा आत्महत्या देखिएन ।’ उनले घाँटी थिचेर हत्या भएको देखिएको बताए ।

रसिदाका श्रीमान् भने ९ असारमा नै फरार थिए । गाडिएको शव उत्खनन गरी पोष्टमार्टम गर्न वीपी कोइराला स्वास्थ्य विज्ञान प्रतिष्ठान धरान पठाएर प्रहरीले अनुसन्धान सुरु गरेको थियो ।

प्रारम्भिक अनुसन्धानका क्रममा रसिदामा डिप्रेशनको समस्या हुनसक्ने देखिएको छ ।

घटनापछि फरार भएका कारण अनुसन्धानका लागि प्रहरी प्रतिवेदन अनुसार मियाँको नाममा सुनसरी जिल्ला अदालत इनरुवाले ३ चैत २०७६ मा पक्राउ पूर्जी जारी गरेको थियो ।

एक वर्षयता फरार भएका मियाँ बुधबार आफैँ उपस्थित भएपछि मुलुकी फौजदारी कार्यविधि (संहिता) २०७४ अनुसार १० दिन म्याद थप गरी अनुसन्धान सुरु गरिएको प्रहरी उपरीक्षक थापाले बताए ।

Leave a Reply

Your email address will not be published. Required fields are marked *